ويهين صدي عيسويءَ ۾ ٻين ڪيترن اهم اڳڀرائين مان هڪ اڳڀرائي هوا کان به ڳري اڏام جي صورت ۾ سامهون آئي. پهرين مهاڀاري لڙائيءَ (19-1914ع) ۾ اهڙن جنگي هوائي جهازن کي علاقائي نگراني ۽ بمباريءَ لاءِ استعمال ڪيوويو، جن کي ماڻهو هلائي رهيا هئا. انهن لڙائين دوران جنگي هُنر جي ماهرن جوليودوهٽ (Giulio Douhet ) [1869-1930]۽ وليم مچل (William Mitchell) [1879-1936]مستقبل ۾ هوائي طاقت جي اهميت جي پيشنگوئي ڪئي. ”دوهٽ“ خاص طور دليل ڏنو ته مستقبل جي لڙائين ۾”هوائي برتري“ دُشمن جي ٺڪاڻن کي سرحد کان ٻاهران بمباريءَ ذريعي نشانو بڻائي حاصل ڪري سگهجي ٿي. هن جي خيال مطابق فوجي توڙي غيرفوجي (Civilian) حوصلي ۽ همت کي ان طريقي سان جلدي ۾ ختم ڪري سگهجي ٿو. ٻي مهاڀاري لڙائيءَ (45-1939ع) ۾ وڌيڪ اهم تبديليون ۽ سائنسي ۽ فني ايجادون ٿيون. انهن ۾ خاص طور جوهري (Nuclear) هٿيار۽ بئلسٽڪ ميزائيلن جو سرشتو آهي. انهن تبديلين”دوهٽ“ جي پيشنگوئيءَ ۽ اڳڀرائيءَ جي نظريي کي سچو ثابت ڪيو. نين ٽيڪنالاجيز خاص طور Stealth نالي سان هوائي جهازن جي ايجاد ۽ صورتحال سمجهڻ جي سگهه (situation power) جي استعمال سان آمريڪي هوائي فوج ”دوهٽ“جي ڏنل خواب، ”هوائي ڪمان“ کي سچ ثابت ڪري ڏيکاريو